Pira suwene aku kudu ngetung lintang
nrithil saben wengi ing langit klawu
kekancan pengarep-arep suwung
ing sangarepe kori kang bisu
Wektu peplayon antaraning urip lan pati
dedhepe golek welasing kalodhangan
tansah tinetheg rapet tangan prakosa
lan benteng-benteng kukuh
kinarya malangi sumuke mangsa
saya kalagar mawa panas kagila-gila
Cakramanggilingan dhapur pepenginan
sumlempit antarane kanyatan luput ramalan
nanging gawe lawe abang kojahe pepenginan
mandheg, ketampeg jaman
dadi panglipur kekarepan sing coklek
sawise tanpa menangi jumbuhe wewarah
sajerone kanyatan wantah,
Sarwa mangu-mangu
antarane petungan iki lan iku
